Dous mapas curiosos, pero sen relación ningunha entre eles; o primeiro, da distribución do catolicismo en Europa,
e o outro, un máis da serie “como se di…?” e neste caso, cervexa por esta banda do mundo.
Se hai a quen lle presten, facendo clic nos mapas hai máis info, os fíos de reddit onde as atopei.
Na miña visita cotiá a reddit, hoxe arregalei os ollos á vista deste mapa, que polo que puiden saber vai en chinés mandarín.
Coa curiosidade habitual déuseme por ir buscar se había máis, pero a falta de coñecemento da língua impediume chegar moito máis lonxe. Ao máis que cheguei foi, grazas ao redditor weigeren, a localizar unha web onde había algún mapiña máis da península ibérica.
Os mapas pódense ver no seu tamaño orixinal facendo clic neles. Agardo que vos presten tanto como me prestaron a min e aproveito para agradecer a quen sexa que fose que se lle dese por escanear todo isto.
Desde que Yanko Tsvetkov comezase con aqueles mapas seus que tornaron virais e nos que cartografiaba os estereotipos xa pasaron cinco anos. Máis coñecido como Alphadesigner, Yanko Tsvetkov é un artista gráfico búlgaro e residente en España leva publicados na rede centos destas cartografías dos prexuizos que agora vén de publicar un segundo libro, o Atlas of Prejudice 2.
Ao fío desa publicación abrira un tumblr no que, para ir facendo gana, deixou esta cousa bonita, Vinte xeitos diferentes de dividir un continente.
Pouco que dicir agás que eu véxonos máis na Potato Europe que na Tomato Europe.
Coa que vai aí fóra lembrei que aí atrás o @Cascarelo puxera un mapa de precipitacións anuais en Europa. Non hai dúbida, aquí chove.
Outras fontes tamén apuntan a esa posibilidade; aí van media ducia de mapas de precipitacións de Europa e mais de España, cada un do seu pai e da súa nai.
Confírmase o que xa sabía, fóra segue chovendo.
Hai un par de meses a un usuario de reddit, Bezbojnicul, déuselle por facer uns mapas etimolóxicos. Historias comúns de línguas en contacto sobre unhas terras nas que comerciar, loitar e emigrar, as diferentes orixes de palabras comúns sobre un mapa de Europa.
Curiosidades como a de que o portugués sexa a única língua de Europa Occidental na que chá é a palabra para o té por chegarlle desde Cantón, onde traían chá a Europa, mentres que os holandeses traían té desde Fujian.
Ou de a palabra para rosa en grego antiguo só se conserve en friuliano.
E tantos outros mapas interesantes que ata deron para inspirar e ter un subreddit propio, Etimology Maps.
Maps for the World é unha colección de mapas históricos, a maioría pertencen ao servizo cartográfico do Exército Ruso e pódese navegar por entre eles e baixalos desde o interface de Google Maps que implementaron.
Que hai unha chea de mapas online por aí ciscados é ben sabido, tanto coma para saber do traballiño que dá poñerse a buscar por algún.
Old Maps Online é un traballo froito da colaboración entre The Great Britain Historical GIS Project e mais Klokan Technologies, os creadores de MapRank, e vén sendo un buscador de mapas antigos que tira da API de google maps para xeolocalizalos e datalos así como para facer procuras e restrinxilas por lugar e datas sobre os mapas de google.
O interesante é que facilita as procuras por entre diversas fontes, entre as que se inclúe a colección dun señor do que xa teño falado por aquí, David Rumsey, que tamén viña usando o mesmo interface de MapRank no seu sitio web, ao que pretende engadir os 27.000 mapas que ten online.
Que vos preste.