Contaba a miña nai que, de neno, me sabía as matrículas todas dos carros de familiares e viciños, aínda lembro moitas: un Mini OR-28610, un Seat 127 PO-8888-E, un Seat 132 PO-9110-M,… e máis que podería enumerar sen parar.
Sígoas lembrando e seguen a chamar a miña atención. Por Europa adiante teño visto placas de matrícula de lugares que nunca pensaría ver: Iran, Iraq, Qatar, Rusia, Kirguizistán, Dubai, Bielorrusia, San Marino…
Pero a neste curruncho noso non chegan tantos carros de lonxe e os meus avistamentos extraordinarios por acó redúcense a algún carro que veu de América (na zona de Avión non é estraño ver algún carro con placa mexicana), un Audi Q8 de Omán, unha moto con placa chinesa ou algún carro con placa das illas do Canal da Mancha ou de San Marino.
Así, pasa que de entre todos os subreddits de carros que sigo, hai un no que perdo o tempo coma nun pozo sen fondo, o das Foreign Plates Spotting, no que os usuarios publican fotografías de matrículas de carros lonxe da súa casa. Hoxe fixen alí o meu primeiro post aproveitando que circulaba por atrás dun trailer marroquí con placas de Mohammedia e levaba comigo un copiloto que me tirase unha foto.
