Tag Archives: mapa

3821 days ago 1 Comment Permalink

Praias de Galicia para Google Earth

Impresionante traballo é o que vén de realizar o Grupo de Investigación en Recursos Mariños e Pesquerías da Universidade da Coruña ao crear unha capa para Google Earth con información das praias galegas.

praias_morrazo

Con esta capa, visible abrindo un kmz para Google Earth chamado Praias de Galicia, facilítase a visualización da información que xa, desde hai anos, existía na Guía de Praias de España do Ministerio de Medio Ambiente, pero que o equipo deste proxecto integra no interface de Google Earth ubicando todas as praias sobre a cartografía de google, algo no que falla a páxina do Ministerio, que na súa última revisión perdera os mapas esquemáticos de accesos ás praias que aparecían na versión anterior da guía.

detalle_praias_galicia

Debido ás dificultades para localizar e obter calquera tipo de cartografía dixital temática, incluindo os datos máis básicos da nosa costa, cómpre destacar o traballo deste Grupo á hora de xerar a información cartográfica dixitalizada que ofrece, baixo licencia Creative Commons, desde a súa páxina de descargas e que inclúe capas con información desde das praias ata dos caladeiros de pesca ou bancos marisqueiros das nosas costas.

3867 days ago 4 Comments Permalink

Cartografiando moedas

Con  The Euro Invasion of France Strange Maps amósanos un mapa que se presentou nun estudio realizado en Francia durante o ano 2002 sobre a evolución da distribución de Euros alemáns, belgas e españois en Francia.

euro-invasion

O estudio foi realizado consultando a uns milleiros de persoas polas moedas que levaban con eles para comprobar cantas eran moedas francesas fronte ás emitidas por outros países da Unión e foi publicado na edición de novembro dese ano de Population et Sociétés, a publicación mensual do INED (Institut national d’etudes demographiques), aquí en PDF.

Chama a atención o efecto que se produce nas fronteiras cos países viciños e de como as súas moedas foron invadindo Francia, ou de como, entre marzo e setembro dese ano, case que se dobrou a cantidade de moedas estranxeiras, dun 4,7% a 9,2%, tendo en conta que a porcentaxe variaba segundo a denominación da moeda, así só o 3% das moedas de 1 céntimo eran de fóra fronte ao 14% das moedas de 2 euros.

Á vista do estudio vese ben que a invasión foi enorme e rápida e que extrapolada a outros países da Unión Europea, hoxe, 9 anos despois debe ser estatisticamente improbable que non levemos unha moeda emitida por un país diferente ao noso no peto.

3915 days ago 2 Comments Permalink

Frecuencias e estacións emisoras, os mapas

Tiña razón Modesto, tuiteando que me podía interesar fmscan.org e facíao cunha ligazón ao mapa das frecuencias nas que emite a Radio Galega e o seu alcance aproximado.

fm_map1

Cunha impresionante base de datos baseada nas frecuencias emisoras de radio tanto en OM como FM de todo o mundo e as diferentes estacións emisoras, os mapas que se poden xerar con fmscan, ademáis de ofrecer unha chea de datos técnicos, dan para saber cal é a mellor frecuencia nun lugar determinado de Galiza, ou cales son as radios portuguesas que chegan acó, ou tamén para preguntarse o porqué desa extraordinaria densidade de estacións emisoras de Radio Nacional de España en terras vascas.

Se che gusta a radio, un bo sitio para atopar respostas, e se che gustan os mapas, un bo lugar para que xordan preguntas.