opaco

Quizais cando a Ministra de Fomento, Magdalena Álvarez, dixo o outro día en Vigo que Galicia se ha subido al tren de la modernidad á hora de presentar os novos trens que unen Galiza e Barcelona estaba pensando no Modernismo, unha corrente artística de finais do século XIX e primeiros do XX.

Posiblemente fose novidoso o anuncio dun tren que reduce o tempo de viaxe entre Vigo e Barcelona de 16 horas, o tempo que leva voar de Londres a Tokio, a 14 horas, coma nun voo de Barcelona a Bos Aires, de terse anunciado sequera no século XX, pero estamos en 2009 e ese mesmo día do anuncio a mamá de opedro collía un tren en Pontevedra con destino Vigo ás 8:32 que só chegaría ás 9:13, un traxecto de 41 minutos, cando se supuña que chegaba ás 9:05. No martes mamá chegou en tempo, decidiu coller un autobús que xunto con outros moitos vehículos conxestiona os accesos a Vigo desde unha autoestrada de peaxe que pagamos todos e algún máis pasando pola ponte de Rande, esa mesma ponte da que falan en ampliar …cos cartos de quen?

Por certo, estou buscando novas por saber se o mesmo anuncio que fixo a ministra en Vigo tamén o fixo en Barcelona, pero parece que non foi así; sería que non era aceptable facelo en Barcelona, ou é que non se atreveu? Aló a nova deberíana titular cun Galicia segue a perder o tren da modernidade.

Pódese ler algo máis ao redor desta «noticia noticiosa» no apunte de Trens de Galicia de Arume dos Piñeiros. A foto foi roubada na  de ACAF, Asociación Compostelana de Amigos do Ferrocarril.