Opaco

Se hai unha páxina que ten a especial habilidade de xuntar nun mesmo lugar os mapas máis estraños, curiosos e interesantes que circulan pola rede, non pode ser outra que a de strange maps.

Por mor do pouco tempo que houbo para o lecer estes días, foi que deixei unha chea de anotacións pendentes de lectura no bloglines e, entre elas, algunhas das súas anotacións, como este mapa de dominios de países segundo a súa poboación do .ad ao .za,

ou este outro que amosa unha representación do ano 1937 no mundo, no que se destacan as guerras que se sofrían na China e mais nunha España dividida entre a zona gubernamental e mais a zona insurxente mentres en Europa ían elixindo bando para a próxima guerra mundial.

De estar interesado no mundo dos mapas, ou da xeografía, historia, ilustración, ou calquera outro experimento que se poida facer sobre mapas, paga a pena mergullarse nos arquivos desta páxina e ler as historias que se agochan detrás.

No mesmo lugar ás mesmas horas, outro achádego sobre cartografías sobrias pero coloristas, este mapa de Europa na que se representa a predominancia de cabelos loiros entre a poboación.

Ou este outro dos grupos lingüísticos en Europa, cunha colorida e clara representacion dos espazos ocupados polas diferentes linguas.

E aínda hai moitos máis, unha sorprendente colección de mapas de Europa, da man da eupedia, que van desde as clásicas representacións demográficas ata… pasen e vexan.