opaco

E aínda hai máis mapas, ou visualización de datos en mapas. Eis que o Robert se preguntou que ocorrería se se unisen sobre o mapa todos os códigos postais dos Estados Unidos en orde ascendente…

Partindo do zipcode, unha aplicación que permite navegar interactivamente polos códigos postais, foi quen de chegar a conseguir un resultado sorprendente.

E agora, utilizando os datos de geonames, do que xa temos comentado algo por acó, vén de engadir á súa colección os mapas dunha ducia de países máis, e entre eles o mapa de España, do que di que a distribución dos códigos postais é interesante, onde moitas das liñas que se fan para unilos non se cruzan, coa única excepción de Galiza, que destaca por amosar a estructura dun garabato moi denso.

Na súa páxina se pode ler unha completa descripción do proxecto, así como diferentes imaxes dos mapas en maior tamaño.

Quizais para a próxima negociación do estatuto e visto que non se puxeron dacordo en quen a ten máis grande, habería que propoñer para o preámbulo o de que Galiza desenvolveu unha clara identidade cultural e política reflectida no garabato máis caótico da Península Ibérica.