Opaco

Á vista de como cambiou a rede e os aparellos desde os que nos conectamos a ela nos últimos dez anos, non vou moi desencamiñado se penso que nos próximos dez anos ha cambiar moito máis. Así, a xeración que anda aínda coa chupeta na boca estará interconectada como ninguén o estivo antes; saltarán por riba das conexións de fíos para ser usuarios da internet nas rúas.

Pero desde a experiencia de conectar á rede desde a rúa a cotío cunha pda, hoxe en día é caro, moi caro, se non se dispón dun aparello con wifi e dunha rede aberta próxima, algo ben difícil desde o momento que son moitos os lugares que nen sequera teñen acceso á banda ancha.

E os deseños das páxinas, a maioría dos deseños fan aínda menos accesible esta internet desde a rúa. Desde unha pantalla de 320×320 no treo, ou de 420×320 no t5, ou de xente que ten 240×240, ou 128×128 nun telemóvel hai páxinas que se fan ilexibles, ben por teren imaxes enormes e parágrafos anchos que non caben nas nosas pantallas, con deseños en flash que non se ven por ningures, ou ben por unha publicidade intrusiva que non nos deixa ver o contido que nos interesa, e, dese xeito, incidindo aínda máis no aspecto económico, ao ter que descargar (e pagar) datos totalmente irrelevantes desde o noso punto de vista.

Con todo, sempre hai servizos que facilitan a navegación. Son usuario desde hai tempo de Skweezer, un servizo que permite navegar a través dun proxy, como tamén o ten o google, encollendo as páxinas e eliminándolle o contido pesado, e así foi unha sorpresa que o Bloglines mobile (para voltar ao Bloglines orixinal, aquí), que tamén me resulta moi cómodo para ler os feeds desde a estrada, incorporara o skweezer para as ligazóns fóra do lector de feeds. Problema a corrixir, as ligazóns que se envían por correo desde o bloglines mobile incorporan o alixeirador do skweezer, e fanse incómodos desde o ordenador.

Nesta onda, son moitos os que ofrecen servizo móbil e os que, aos poucos, vanse sumando máis a facilitar a accesibilidade ao lector móbil.

Destes últimos, o que veño de engadir aos marcadores no pda é o chuzamóbil, que fai compañía a El País, El Mundo, Google, Yahoo, Skweezer ou a Wapedia, a wikipedia móbil, para sabermos de que anda a falar o mundo desde calquera lugar.

E para dar exemplo, e tal que é ben fácil engadir accesibilidade móbil a calquera páxina montada sobre o Wordpress, veño de engadir unha nova extensión, a Wordpress PDA que, só con detectar o navegador que utiliza a PDA ou o telemóvel, carga unha plantilla, e que se pode editar, máis alixeirada. O resultado é moi bo visto desde a rúa, xa que non dá traballiño ningún e é fácil de personalizar, como tamén fai a quizais menos vistosa extensión wp mobile.

Outros aínda non o fixeron. A que agardan? Facilitádenos a lectura.

P.S. Os de google toman nota e bótannos un cabo aos utilizadores de palm; veñen de presentar o google maps para Treo (e palms con wifi)