opaco

Ata o de agora Geowalk viña funcionando como unha web que, utilizando os mapas do google, fornecía sobre eses mapas información relevante para o viaxeiro, de xeito que apenas cun doble click nun punto calquera do mapa desprega información recollida da wikipedia, fotografías do flickr a conta dos seus tags e mais información dos hoteles desa zona.

Nestes días pasados actualizaron cun novo servizo descuberto no googlemapsmania, o world airport explorer, que disque amosa todos os aeroportos do mundo. Tiña moi boa pinta, pero avisado nos comentarios fun ver e atopei cousas ben curiosas.

E é que a pesares de que o aeroporto de Peinador ocupa terreos dos concellos de Mos, Redondela e Vigo, nunca antes vira o de aeroporto de Redondela.

Ten tres línguas a dispor do usuario, alemán, inglés e francés, que só serven para liar máis o conto en caso de dúbidas, así, para ver os aeroportos galegos, se escollemos língua, imos a europa, logo a europa do sur e, ao fin, a españa, ao facer click no aeroporto de Alvedro só acerta a versión inglesa, a versión alemá localízao como de Ferrol e a versión francesa dinos que é o aeroporto de Mugardos, ademáis de situalo en pleno porto da Coruña.
Das tres linguas parecería que o inglés é a língua máis fiable, pero non habería que esquecer que co aeroporto de Vigo só é quen de dar a versión francesa.

Na ubicación dos aeroportos fallan en practicamente todas as marcas dos mapas, como ao ubicar o de Labacolla fóra de Santiago pero en dirección oposta a onde debería estar.

Iso si, desde o momento que o aeroporto de Madrid-Barajas pode converterse no de Coslada, os ourensáns todos deberían saber que, por mor de todos estes servizos machucados dos mapas de google, a súa provincia xa ten aeroporto de Ourense de seu, e está no mesmiño centro de Chaves.